ԵՊՀ ՍԹԵՄ ավագ դպրոցի հաջողությունները օլիմպիադաներում. մոտիվացիան և համակարգված աշխատանքը՝ մեկտեղված
ԵՊՀ ՍԹԵՄ ավագ դպրոցը շարունակում է գրանցել կրթական նշանակալի հաջողություններ՝ այս անգամ առանձնանալով առարկայական օլիմպիադաների հանրապետական փուլում գրանցած բարձր արդյունքներով։ Դպրոցի աշակերտների ձեռքբերումները ոչ միայն անհատական հաջողությունների պատմություններ են, այլև համակարգված կրթական աշխատանքի և նպատակային միջավայրի արդյունք։
Այս ուսումնական տարում հանրապետական փուլում «Հայոց լեզու» առարկայից առաջին կարգի մրցանակ է ստացել 10-րդ դասարանի աշակերտ Ծովինար Մովսիսյանը։ 11-րդ դասարանի աշակերտ Արման Ավետիսյանը դարձել է հանրապետական փուլի երրորդ կարգի մրցանակակիր միաժամանակ երկու՝ «Հայոց լեզու» և «Հայոց պատմություն» առարկաներից, իսկ 12-րդ դասարանի աշակերտներ Մարիամ Գալստյանն ու Նարեկ Ավետիսյանը՝ «Կենսաբանություն» առարկայից։
